JUGpress

Niš-Beograd

Direktori Nišvil džez festivalesoro, Ivan Blagojević, inicijatori aso vazdiba liparnobar e Šabane  Barjamovićese, godini so bi o liparnobar valjani te vazdelpe  ano sredmaškar e dizijaćhe kote bi šaj te dikelpe ano piravdo than.   

Saja aso talimćheriba liparnesorobar dinde o amala penđaruthne dilabćherdesere Goran Bregović, Goran Paskaljević, Ljubiša Samardžić. Šeruthno dizijakoro Niš Miloš Simonović dinđa jekh pli poćimi, direktori Ivan Blagojević dinđa 20 postia malikane liparnebaresere, a o ovuthno premijeri Zoran Živković donirinđa 10 postia. Talimćheripe liparnebaresoro si paše 12 000 evria, a talimćherđale o akademsko vajari Vlada Ašanin.

Akala dive ađičerđape thanesiri  mekli jel o inicijatoria  akcijakere  em nadležna institucije naštine te razialenpe zalo than kote ka vazdelpe o liparnobar.

“Adalese so e nišakere  komunakere gavanmania, panda na adle krisi ked ka, kuri em dali ka anosasoithno ka ovel vazdime o liparnobar e  Šabane Barjamovićese ani Niš, inicijatori aso vazdipa liparnobaresoro akale bare  romanja muzikakere,Ivan Blagojević, direktori Maškarselorikne  džez festivalesoro Nišvil, anđa krisi te o liparnobar e Barjamovićese, pale ovel pučardo  ko 12.avgust ko jekh kamioni kova ka ovel čivdo anglo tržno maškar Kalča. Sakoj pativ e Nišlijenđe ko asajba e Šabanea“ motovela  o direktori Muzejesoro romanja kulturakoro Dragoljub Acković.

“Rajo Nišesere, ako nane kuri te čiven o liparnobar  tumare  zalothemuthnonese e Šabane  Barjamovićese, bahaninava te na igarelen palal koro vajari, ake tumen anenle ani Beograd em čivelne  ano Muzeji romanja kulturakoro, pa te kaj anđen pandlo lafi em kana  anen pandlo lafi, igarelne  pale ani Niš, jel sem siguro soj  e Beograd pale Niš, e Šabanese ine  dujto ćher. Numaj  na anđen pandlo lafi, so ka čeren adale liparnebarea, ov neka očol, koro amende eno Muzei, jel ate ole niko na ka  foldel, ake amen sare katane ka kamale  sar so kamljamle  đikaj ine  đivdo“ vačeri o Acković.